மொழிபெயர்ப்பின் மூலக் கட்டுரையை இங்கே காணலாம். 

கடந்த புதனன்று, 1,200 இஸ்ரேலிய பல்கலைக்கழக கல்வியாளர்களும் நிர்வாகிகளும் காஸாவில் இஸ்ரேலிய இராணுவத்தால் இழைக்கப்பட்டுவரும் “போர்க் குற்றங்கள் மற்றும் மனிதகுலத்திற்கு எதிரான குற்றங்களை” எதிர்த்து ஒரு பகிரங்க கடிதத்தை வெளியிட்டனர்.

இஸ்ரேலில் உள்ள பல்கலைக்கழகத் தலைவர்கள் சங்கம், கல்வி பொதுக் கல்லூரிகள் வாரியம், இஸ்ரேல் அறிவியல் மற்றும் மனிதநேய அகாடமி மற்றும் இஸ்ரேலிய ஜனநாயகத்திற்கான கல்வியாளர்கள் ஆகியோருக்கு அனுப்பப்பட்ட இந்தக் கடிதம், மார்ச் மாதத்தில் “ஆபரேஷன் கிதியோனின் ரதம்” என்ற இராணுவ நடவடிக்கை தொடங்கப்பட்டதற்கான எதிர்வினையாகும். இது, இப்போது இஸ்ரேலிய அரசாங்கத்தினால் மேற்கொள்ளப்பட்டுவரும் பகிரங்கக் கொள்கையான காஸாவை இனச்சுத்திகரிப்பு செய்வதைப் பின்தொடர்வதிற்கு, பாலஸ்தீனிய மக்களின் பெருமளவிலான பட்டினியைப் பயன்படுத்துகிறது.

அந்த அறிக்கை பின்வருமாறு அறிவிக்கிறது:

மார்ச் 18 அன்று, இஸ்ரேல் போர் நிறுத்தத்தை மீறியதிலிருந்து, காஸாவில் கிட்டத்தட்ட 3,000 பேர் கொல்லப்பட்டுள்ளனர். அவர்களில் பெரும்பான்மையானவர்கள் பொதுமக்கள் ஆவர். போர் தொடங்கியதில் இருந்து, காஸாவில் குறைந்தது 53,000 பேர் கொல்லப்பட்டுள்ளனர். இதில் குறைந்தது 15,000 குழந்தைகளும், 41 இஸ்ரேலிய பணயக்கைதிகளும் அடங்குவர். அதே நேரத்தில், பல சர்வதேச அமைப்புகள் கடுமையான பஞ்சம் குறித்து எச்சரித்து வருகின்றன. இந்த பஞ்சம் வேண்டுமென்றே மற்றும் வெளிப்படையாக அறிவிக்கப்பட்ட இஸ்ரேலிய அரசாங்க கொள்கையின் விளைவாக ஏற்பட்டுள்ளது. அத்துடன், இது காஸாவை மனிதர்கள் வாழ தகுதியற்ற ஒரு பகுதியாக மாற்றுவதும் அடங்கும். மருத்துவமனைகள், பள்ளிகள் மற்றும் பிற நிறுவனங்கள் மீது இஸ்ரேல் தொடர்ந்து குண்டுகளை வீசி வருகிறது. தற்போதைய இராணுவ நடவடிக்கையான “கிதியோனின் இரதங்களுக்கான” உத்தரவுகளில் வரையறுக்கப்பட்டுள்ளபடி, போரின் அறிவிக்கப்பட்ட இலக்கு, “மக்களை குவியலாக இடம்பெயரச்” செய்வதாகும். இது போர்க்குற்றங்கள் மற்றும் மனிதகுலத்திற்கு எதிரான பயங்கரமான குற்றங்களின் ஒரு தொகுப்பாகும். இதற்கு நாம் அனைவரும் பொறுப்பாகும்.

கல்வியாளர்கள் என்ற வகையில், இந்தக் குற்றங்களில் எங்கள் சொந்த பங்கை நாங்கள் அங்கீகரிக்கிறோம். மனித குலத்திற்கு எதிரான குற்றங்களை இழைப்பது அரசாங்கங்கள் மட்டுமல்ல, மனித சமூகங்களே. சிலர் நேரடி வன்முறை மூலம் அவ்வாறு செய்கிறார்கள். மற்றவர்கள் குற்றங்களை அங்கீகரிப்பதன் மூலமும், உண்மைக்கு முன்னும் பின்னும் அவற்றை நியாயப்படுத்துவதன் மூலமும், கற்றல் அரங்குகளில் அமைதியாகவும் மௌனமாகவும் குரல்களை வைத்திருப்பதன் மூலமும் அவ்வாறு செய்கிறார்கள். இந்த மௌனப் பிணைப்புதான் தெளிவாகத் தெரியும் குற்றங்கள் அங்கீகாரத்தின் தடைகளைத் தாண்டிச் செல்லாமல் தொடர அனுமதிக்கிறது.

இந்தக் கடிதம் இஸ்ரேலுக்குள் போருக்கு எதிரான மக்கள் எதிர்ப்பு வெளிப்படுவதைக் குறிக்கிறது. இந்த எதிர்ப்பு எந்த அளவிற்கு பரந்த அடித்தளத்தைக் கொண்டுள்ளது என்பது இன்னும் தெளிவாகத் தெரியவில்லை. சமீபத்தில் வெளியிடப்பட்ட கருத்துக் கணிப்புகள், பாலஸ்தீனியர்களுக்கு எதிரான இஸ்ரேலிய ஆட்சியின் தாக்குதலுக்கு இன்னும் பரவலான ஆதரவு இருப்பதாகக் குறிப்பிட்டன, இந்தக் கருத்துக் கணிப்புகள் துல்லியமாக இருந்தால், பல தசாப்தங்களாக பிற்போக்குத்தனமான சியோனிசக் கொள்கைகள் மற்றும் பிரச்சாரத்தால் உருவாக்கப்பட்ட ஆழமான சமூக நோக்குநிலைச் சீர்குலைவை பிரதிபலிக்கிறது.

இருப்பினும், இஸ்ரேலியர்கள் இடைவிடாது சரமாரியான பொய்களை கட்டவிழ்த்து வருவதை கருத்தில் கொண்டு, 1,000க்கும் மேற்பட்ட கல்வியாளர்கள் அரசாங்கத்தின் கொள்கைகள் குற்றவியலானது என்று கண்டித்திருப்பது ஒரு குறிப்பிடத்தக்க முன்னேற்றமாகும்.

இந்தக் கடிதம் நெதன்யாகு அரசாங்கத்தின் மீது மட்டுமல்ல, மாறாக காஸாவில் இஸ்ரேலின் இனப்படுகொலை மீதான விமர்சனங்களை “யூத-எதிர்ப்புவாதத்தின்” ஒரு வடிவமாக கண்டனம் செய்துள்ள வாஷிங்டன், இலண்டன், பேர்லின் மற்றும் பிற தலைநகரங்களில் உள்ள அதன் சர்வதேச ஆதரவாளர்கள் மீதும் ஒரு பேரழிவுகரமான குற்றச்சாட்டாக உள்ளது. இது தொடர்பாக ஹாரெட்ஸ் மற்றும் அல் ஜசீராவில் முக்கிய செய்திகள் வந்திருந்தபோதிலும், நியூ யோர்க் டைம்ஸ் மற்றும் பிற பிரதான ஏகாதிபத்திய ஊடக நிறுவனங்கள் இந்தக் கடிதம் குறித்து எந்த செய்தியையும் வெளியிடவில்லை.

2023 ஆம் ஆண்டு நெதன்யாகு அரசாங்கத்தின் நீதித்துறையை அடக்கும் முயற்சிக்கு எதிரான வெகுஜன போராட்டங்களில் இஸ்ரேலிய பல்கலைக்கழகங்கள் ஆற்றிய குரல் பங்கை, நடந்து வரும் இனப்படுகொலை குறித்து அவர்கள் கொண்டிருந்த ஒப்பீட்டு மௌனத்துடன் இந்தக் கடிதம் வேறுபடுத்திக் காட்டுகிறது.

இந்தக் கடிதம் பின்வருமாறு அறிவிக்கிறது:

நீதித்துறை மாற்றத்திற்கு எதிரான போராட்டத்தில் இஸ்ரேலிய உயர்கல்வி நிறுவனங்கள் முக்கிய பாத்திரம் வகிக்கின்றன. இந்தப் பின்னணியில்தான், காஸாவில் இடம்பெற்றுவரும் படுகொலைகள், மற்றும் அழிவுகளுக்கு முகங்கொடுத்து, அங்குள்ள கல்வி முறை, அதன் மக்கள் மற்றும் அதன் கட்டமைப்புகள் முற்றிலுமாக ஒழிக்கப்படுவதுக்கு முகங்கொடுத்து அவர்கள் மௌனம் காத்து வருவது மிகவும் குறிப்பிடத்தக்கது.

காஸா இனப்படுகொலைக்கு இஸ்ரேலில் எதிர்ப்பு அதிகரித்து வருவதற்கான பிற அறிகுறிகளும் உள்ளன.

கடந்த செவ்வாயன்று இஸ்ரேல் எங்கிலுமான பல்கலைக்கழகங்களில் நடந்த ஆர்ப்பாட்டங்களைத் தொடர்ந்து இந்தக் கடிதம் வெளியிடப்பட்டது. அங்கு மாணவர்களும் விரிவுரையாளர்களும் காஸாவில் நடந்து வரும் இனப்படுகொலையை எதிர்த்துப் போராடினர். “எங்கள் பெயரில் செய்யப்படும் குற்றங்களுக்கு தொடர்ந்து மறுப்பு மற்றும் மௌன ஆதரவுக்கு எதிரான முதல் நடவடிக்கை இது” என்று ஏற்பாட்டாளர்கள் ஹாரெட்ஸிடம் தெரிவித்தனர். டெல் அவிவ் பல்கலைக்கழகத்தில், இனப்படுகொலையை எதிர்த்து போராடிய மாணவர்களும் விரிவுரையாளர்களும் வளாக பொலிஸ் அதிகாரிகளால் தாக்கப்பட்டனர்.

போராட்டத்தின் ஒழுங்கமைப்பாளர்களில் ஒருவர் ஹாரெட்ஸ் க்கு கூறுகையில், “ஒரு திருப்புமுனையின் உணர்வு உள்ளது, இப்போதிலிருந்து, பின்வாங்குவது சாத்தியமில்லை,” என்றார். மேலும், “ஒரு முழு சமூகமும் ஒரு வகையான தணிக்கையின் கீழ் வாழ்கிறது, திணறுகிறது, அவர்களின் குரல்கள் தொண்டையில் சிக்கிக் கொள்கின்றன. மாணவர்களிடம் இருந்து எங்களுக்கு கிடைத்த செய்தி தெளிவாக உள்ளது. நாம் அமைதியாக இருப்பதை நிறுத்த வேண்டும் என்று அவர்கள் கோருகின்றனர்” என்று அவர் மேலும் கூறினார்.

ஹைஃபா பல்கலைக்கழகத்தின் பேராசிரியரான அய்லெட் பென்-யிஷாய் அல் ஜசீராவிடம் கூறுகையில், இதில் பங்கேற்ற சிலருக்கு இனப்படுகொலையை பகிரங்கமாக எதிர்ப்பதற்கான முடிவு கடந்த “மார்ச் மாதத்தில் போர் நிறுத்தம் முறிந்ததற்கு பதிலளிக்கும் விதமாக இருந்தது. அது பலருக்கு ஒரு திருப்புமுனை தருணமாக இருந்தது, அன்றிலிருந்து காஸா மீது நாங்கள் திணித்து வரும் பட்டினியையும் கண்டது” என்று அவர் குறிப்பிட்டார்.

இந்தக் கடிதத்தை வெளியிட ஏற்பாடு செய்த குழு கருப்புக் கொடி நடவடிக்கை வலையமைப்பு என்று அழைக்கப்படுகிறது.

டெல் அவிவ் பல்கலைக்கழகத்தின் பேராசிரியர் ஆன் பராக் ஹாரெட்ஸிடம் கூறுகையில், இந்தக் குழுவின் பெயர் “1956 காஃப்ர் காசிம் படுகொலையைத் தொடர்ந்து, அப்போதைய ஜெருசலேம் நீதிமன்ற நீதிபதி பெஞ்சமின் ஹாலேவி உருவாக்கிய வார்த்தையைக் குறிக்கிறது. அதில் 48 அப்பாவி பாலஸ்தீனியர்கள் இஸ்ரேலிய எல்லைப் போலீசாரால் கொல்லப்பட்டனர்” என்று குறிப்பிட்டார். மேலும், நீதிபதி ஹாலேவி தனது தீர்ப்பில், “வெளிப்படையான சட்டவிரோதத்தின் தனிச்சிறப்பு என்னவென்றால், கொடுக்கப்பட்ட உத்தரவின் மீது அது ஒரு கருப்புக் கொடியைப் போல அசைக்க வேண்டும், இது ‘தடைசெய்யப்பட்டுள்ளது!’ என்று கூறும் ஒரு எச்சரிக்கையாகும்! முறையான சட்டவிரோதம் அல்ல... மாறாக, தெளிவான மற்றும் வெளிப்படையான சட்ட மீறலாகும்” என்று ஆன் பராக் குறிப்பிட்டார்.

பராக் மேலும் கூறுகையில், “காஸா மக்கள் மீதான பல இஸ்ரேலியர்களிடையே உள்ள பரவலான அலட்சியம் என்பது, மனிதாபிமானமற்ற தீவிர பிரச்சாரத்தின் விளைவாக ஏற்பட்டுள்ளது, இது தீவிரமாக எதிர்க்கப்பட வேண்டும்” என்று குறிப்பிட்டார்.

நெகேவின் பென்-குரியன் பல்கலைக்கழகத்தின் பேராசிரியர் யேல் ஹஷிலோனி-டோலெவ் ஹாரெட்ஸ் க்கு கூறுகையில், “சிறிதளவு பொறுப்பு அல்லது மனிதாபிமானம் உள்ள எவரொருவரும் இனியும் இந்தப் தாக்குதலை ஏற்க முடியாது. காஸாவில் போர்க்குற்றங்களும் மனித குலத்திற்கு எதிரான குற்றங்களும் பகிரங்கமாக இழைக்கப்படுகின்றன என்பதை நாம் அங்கீகரிக்க வேண்டும். நாம் ஒரு தார்மீக வீழ்ச்சியின் மத்தியில் இருக்கிறோம்” என்று அவர் குறிப்பிட்டார்.

“கல்வியாளர்களின் கடிதம் தனித்துவமானது, அது பாலஸ்தீனியர்களின் துன்பத்தை போருக்கான அதன் ஆட்சேபனைகளின் மையத்தில் வைக்கிறது” என்று அல் ஜசீரா குறிப்பிட்டது.

பேராசிரியர் பென்-யிஷாய் அல் ஜசீராவிடம், “பாலஸ்தீனியர்களின் துன்பத்தை மையமாக்க நாங்கள் விரும்பினோம். நாங்கள் பாலஸ்தீனர்களுடன் இணைந்து ஒற்றுமையுடன் நிற்கிறோம் என்று கூற விரும்பினோம். இது காஸாவில் நாம் செய்யும் செயல்களுக்குப் பொறுப்பேற்பது மற்றும் மக்களின் கண்களைத் திறப்பது குறித்ததாகும்,” என்று குறிப்பிட்டார்.

இந்தக் கடிதம் “இந்த நிலத்தின் அனைத்து மக்களுக்கும், பாலஸ்தீனர்கள் மற்றும் யூதர்களுக்கும்” வேண்டுகோள் விடுக்கிறது. இது, “அப்பாவி மக்களின் உயிருக்காகவும், இந்த நாட்டின் அனைத்து மக்களின் பாதுகாப்பிற்காகவும், பாலஸ்தீனியர்கள் மற்றும் யூதர்கள் அனைவரின் பாதுகாப்பிற்காகவும்; பணயக்கைதிகள் திரும்புவதற்காகவும்; போரை உடனடியாக நிறுத்துமாறு நாம் அழைப்பு விடுக்கவில்லை என்றால், வரலாறு நம்மை மன்னிக்காது என்று அறிவிக்கிறது.

இந்தக் கடிதம் ஒரு தார்மீக வேண்டுகோளின் தன்மையைக் கொண்டுள்ளது. அதன் ஆசிரியர்கள் இனப்படுகொலையின் அடித்தளத்தில் இருக்கும் அடிப்படை வரலாற்று மற்றும் அரசியல் பிரச்சினைகளைப் பற்றி பேசவில்லை. ஆனால், போருக்கு எதிரான சீற்றம் எவ்வளவுதான் ஆழமாக உணரப்பட்டாலும், ஆட்சிக்கு எதிரான ஒரு சக்திவாய்ந்த எதிர்ப்பை அபிவிருத்தி செய்வதற்கு சியோனிச சிந்தனை மற்றும் கொள்கைகளில் இருந்து உடைத்துக் கொள்ளுதல் தேவைப்படுகிறது. 1948 இல் “யூத அரசு” எதன் பிற்போக்குத்தனமான அரசியல் அடித்தளங்களின் மீது கட்டமைக்கப்பட்டதோ, அந்த பிற்போக்குத்தனமான அரசியல் அடித்தளங்களை அடிப்படையாகக் கொண்ட கொள்கைகளின் உச்சக்கட்டமே இந்தப் போரின் இனப்படுகொலை குணாம்சமாகும்.

1948 இல் சியோனிச அரசு அமைக்கப்பட்டதற்கு யூத மற்றும் அரபு சோசலிஸ்டுகள் மற்றும் ட்ரொட்ஸ்கிச நான்காம் அகிலத்தின் எதிர்ப்பு நிரூபிக்கப்பட்டுள்ளது.

“இந்த நிலத்தின் எதிர்காலத்தில் இன்னும் காப்பாற்றப்படக்கூடியவற்றைக் காப்பாற்றுவது நமது கடமை” என்று கடிதத்தின் ஆசிரியர்கள் கூறுகின்றனர். இஸ்ரேலைப் பற்றி குறிப்பிடுவதற்குப் பதிலாக “இந்த நிலத்தைப்” பற்றி குறிப்பிடுவது, பாலஸ்தீன மக்களின் சொத்துக்களை அபகரித்து அழிப்பதன் அடிப்படையில் இஸ்ரேலிய அரசின் இருப்பு, பாரிய படுகொலைகளைத் தவிர வேறு எந்த எதிர்காலத்தையும் முன்கூட்டியே மூடுகிறது என்ற விழிப்புணர்வை அதிகரிப்பதைக் குறிக்கிறது என்று நம்புவதற்கு இந்த சொற்றொடர் ஒருவரை இட்டுச் செல்கிறது.

இப்போதிருக்கும் சியோனிச அரசை புரட்சிகரமாக கலைத்து, பாலஸ்தீனிய மற்றும் யூத தொழிலாள வர்க்கத்தை ஒரு சோசலிச குடியரசில் ஐக்கியப்படுத்துவதே ஒரே நம்பகமான எதிர்காலமாகும்.