காஸாவில் அமெரிக்க-இஸ்ரேலிய இனப்படுகொலைக்கு எதிரான அமைதியான வளாக ஆர்ப்பாட்டங்கள் மீதான பொலிஸ் தாக்குதல்களுக்கு ஜனாதிபதி பைடன் கடந்த வாரம் பச்சைக்கொடி காட்டிய பின்னர், பொலிஸ் வன்முறையின் அளவு மற்றும் கைதுகளின் எண்ணிக்கை தொடர்ந்து அதிகரித்து வருகிறது.

கடந்த வாரயிறுதியில் அமெரிக்கா எங்கிலும் பட்டமளிப்பு விழாக்களில் போராடுவதன் மூலமாக ஆயிரக் கணக்கான மாணவர்கள் பொலிஸ் அரசு ஒடுக்குமுறையை துணிச்சலுடன் எதிர்த்து வருகின்ற நிலையில், ஜனநாயகக் கட்சியினர் மற்றும் குடியரசுக் கட்சியினர் இருவரது பாசிசவாத வாய்வீச்சும் வெட்கக்கேடான பொய்களும் அதிகரித்தளவில் வலியுறுத்தலாகவும் வஞ்சகமாகவும் மாறி வருகின்றன.

நியூ யோர்க் டைம்ஸ் மற்றும் வாஷிங்டன் போஸ்ட் தகவல்படி, காஸாவில் அப்பாவி மக்களை, பிரதானமாக பெண்கள் மற்றும் குழந்தைகள் வேண்டுமென்றே படுகொலை செய்யப்படுவது மற்றும் பட்டினி போடப்படுவதை நிறுத்தக் கோரியும் மற்றும் இஸ்ரேலிய போர் எந்திரத்துடன் தொடர்புபட்ட பெருநிறுவனங்களில் அவர்களின் முதலீடுகள் மற்றும் பாலஸ்தீன மக்களுக்கு எதிரான அதன் குற்றங்களை நிறுத்தக் கோரியும் அமெரிக்க வளாகங்களில் வன்முறையற்ற போராட்டங்களை ஒழுங்கமைத்ததற்காக கடந்த இரண்டு வாரங்களில் 2,300 க்கும் அதிகமானவர்கள் கைது செய்யப்பட்டு குற்றஞ்சாட்டப்பட்டுள்ளனர்.

கடந்த வார இறுதியில் புதிய பொலிஸ் தாக்குதல்கள் நடத்தப்பட்டன.

உள்ளூர் நேரப்படி ஞாயிறன்று அதிகாலை 4 மணிக்கு, ஜனநாயகக் கட்சி மேயர் கரேன் பாஸ் (Karen Bass) அனுப்பிய கலகத் தடுப்பு உடை அணிந்த டசின் கணக்கான லொஸ் ஏஞ்சல்ஸ் பொலிஸ் துறை அதிகாரிகள், தெற்கு கலிபோர்னியா பல்கலைக்கழக (University of Southern California - USC) வளாகத்திற்குள் நுழைந்து, கூடார முகாமில் தூங்கிக் கொண்டிருந்த சுமார் 25 மாணவர்களை பிரதான வளாக வாயிலில் இருந்து வீதிக்கு தள்ளினர். பாலஸ்தீனியர்களை பகிரங்கமாக ஆதரித்து வரும் ஒரு முஸ்லீம் மாணவரான அஸ்னா தபஸ்ஸூமின் (Asna Tabassum) பட்டமளிப்பு உரையை கடந்த மாதம் நிர்வாகம் இரத்து செய்ததற்குப் பின்னர், வளாகத்தில் ஒரு எதிர்ப்பு முகாமை பொலிஸ் அகற்றுவது இது இரண்டாவது முறையாகும். அரசியல் தணிக்கைக்கான அந்த அபத்தமான செயல், தபஸ்ஸூமை வகுப்பில் தலைச்சிறந்த கல்விமானாக தேர்ந்தெடுத்ததற்காக நிர்வாகத்தின் மீது சியோனிச குழுக்கள் நடத்திய தாக்குதல்களைத் தொடர்ந்து வந்தது. முதல் பொலிஸ் தாக்குதலில் 93 பேர் கைது செய்யப்பட்டனர்.

இதன் பின்னர் ஞாயிறன்று, USC தலைவர் கரோல் ஃபோல்ட் (Carol Folt) ஓர் அறிக்கை வெளியிட்டு, “USC இல் எந்தவிதமான சட்டவிரோத முகாம்களையும் நாங்கள் சகித்துக் கொள்ள மாட்டோம்,” என்று அறிவித்தார். மெக்கார்த்தியிச கம்யூனிச-விரோதத்தின் சித்தாந்தக் கழிவறைகளிலிருந்து தோண்டப்பட்ட ஒரு பரவலான கருப்பொருளாக மாறிவருவதை ஒலிப்பதில், அவர்கள் “வேலிகளைத் தாண்டி எங்கள் அதிகாரிகளைத் தாக்கினர்” என்று ஃபோல்ட் “வெளிப்புற பிரச்சாரகர்களை” கண்டனம் செய்தார்.

சனிக்கிழமையன்று, ஜனநாயகக் கட்சி மேயர் பிராண்டன் ஜோன்சனால் (Brandon Johnson) அனுப்பப்பட்ட சிக்காகோ பொலிஸ், சிக்காகோ கலை பயிலகத்தின் வடக்கு தோட்டத்தில், அந்த பயிலகத்தின் பள்ளி மாணவர்களால் அமைக்கப்பட்டிருந்த ஒரு எதிர்ப்பு முகாமை அகற்றியது. காலை 11 மணியளவில் அமைக்கப்பட்ட அந்த முகாம், இரண்டு மணி நேரத்திற்குள் போலீசார் அதை அகற்றி, 68 பேரை கைது செய்து, அவர்கள் மீது அத்துமீறி நுழைந்ததாக குற்றம் சாட்டினர்.

சனிக்கிழமையன்று, டசின் கணக்கான கலகம் ஒடுக்கும் பொலிசார் சார்லோட்ஸ்வில்லில் இல் உள்ள வேர்ஜினியா பல்கலைக்கழகத்தின் ஒரு முகாமைச் சுற்றி வளைத்து, ஆக்கிரமிப்பாளர்கள் மீது எரி இரசாயன பொருளை தெளித்து, 25 ஆர்ப்பாட்டக்காரர்களைக் கைது செய்தனர். 2017 ஆம் ஆண்டில், ஆயிரக்கணக்கான நவ நாஜிக்கள், “வலதுசாரிகளை ஒன்றிணைப்போம்” என்ற இழிவான பேரணியில் அணிவகுத்து, “யூதர்கள் எங்களை பிரதியீடு செய்ய மாட்டார்கள்!” என்று முழக்கமிட்டு அணிவகுத்த அதே வளாகத்தில்தான் பொலிஸ் தாக்குதல் நடந்தது.

பாசிசவாத மற்றும் உண்மையான யூத-எதிர்ப்புவாத போராட்டத்திற்கு எதிராக எந்த பொலிஸும் அணிதிரட்டப்படவில்லை. ஒரு வெள்ளை மேலாதிக்கவாதியால், 32 வயதான எதிர்-ஆர்ப்பாட்டக்காரரான ஹீதர் ஹேயர் (Heather Heyer) படுகொலை செய்யப்பட்டதில், இது உச்சக்கட்டத்தை அடைந்தது. நவ-நாஜி கும்பலில் “மிகச் சிறந்த மக்கள்” இருந்தனர் என்று அப்போதைய ஜனாதிபதி டொனால்ட் ட்ரம்ப், பின்னர் கூறினார்.

சனிக்கிழமையன்று இனப்படுகொலை எதிர்ப்பு ஆர்ப்பாட்டக்காரர்களை பொலிஸ் வளாகத்திற்கு வெளியே தள்ளியபோது, ஆர்ப்பாட்டக்காரர்கள் “ கு க்ளக்ஸ் கிளான் (Ku Klux Klan – KKK), நகரத்திற்கு வந்தபோது நீங்கள் என்ன செய்தீர்கள்?” என்று கூச்சலிட்டனர்.

பல்கலைக்கழக வளாகங்களில் “இடதுசாரி” யூத-எதிர்ப்புவாதத்திற்கு எதிரான சிலுவைப் போரில் முன்னிறுத்தப்பட்டதாக கூறப்படும் சக்திகளை எடுத்துக்காட்ட, கடந்த வாரம் மிசிசிப்பி பல்கலைக்கழகத்தில் (அதன் புனைப்பெயரால் ஓலே மிஸ் என்றும் அழைக்கப்படுகிறது) Mississippi Free Press மற்றும் Daily Mississippian  எடுத்த ஒரு காணொளியில், வளாகத்தில் பாலஸ்தீன ஆதரவு ஆர்ப்பாட்டத்திற்கு முன்னால் தனியாக நின்று கொண்டிருந்த ஒரு கறுப்பின பெண்ணை வெள்ளையின மாணவர்கள் கேலி செய்வதைக் காட்டுகிறது. ஆண்களில் ஒருவன் குரங்கு சைகைகள் செய்து அந்த பெண்ணைப் பார்த்து கூச்சலிட்டான். மற்றொரு வீடியோ தொகுப்பில் ஆண்கள் அவதூறு மற்றும் இனவெறி அவதூறுகளைக் கூச்சலிடுவதைக் காட்டுகிறது.

1962 ஆம் ஆண்டு “ஓலே மிஸ்ஸில்” தான், ஜனநாயகக் கட்சி ஆளுநர் ரோஸ் பார்னெட், கறுப்பின மாணவர் ஜேம்ஸ் மெரிடித்தின் சேர்க்கையைத் தடுக்கும் முயற்சியில் பிரிவினைவாத சக்திகளை கலவரத்திற்கு தூண்டினார். ஜான் எஃப். கென்னடியின் நிர்வாகம் கூட்டாட்சி மார்ஷல்களையும் மிசிசிப்பி தேசிய காவலரையும் ஆப்பிரிக்க-அமெரிக்க மாணவரை சேர்க்க பள்ளியை கட்டாயப்படுத்த அனுப்பியது. இந்த தீவிர வலதுசாரி வெறியாட்டத்தில் இருவர் கொல்லப்பட்டனர்.

நெத்தென்யாகுவின் பாசிசவாத அரசாங்கத்தின் கரங்களில் காஸாவில் நடந்து வரும் இனப்படுகொலைக்கு ஆதரவாக இருகட்சிகளின் விடையிறுப்பை முகங்கொடுக்கையில், மாணவர்களும் ஆசிரியர்களும் போரை தொடர்ந்து எதிர்த்து வருகின்றனர் மற்றும் இஸ்ரேலுடன் தொடர்புகளைக் கொண்ட நிறுவனங்களிலிருந்து விலகக் கோரி வருகின்றனர்.

வியட்நாம் போருக்கு எதிராக ஆர்ப்பாட்டம் செய்த மாணவர்கள் மீது தேசிய காவலர் துருப்புகள் துப்பாக்கிச் சூடு நடத்தி அவர்களில் நான்கு பேரைக் கொன்ற சரியாக 54 ஆண்டுகளுக்குப் பின்னர், சனிக்கிழமையன்று ஓஹியோவில் உள்ள கென்ட் மாநில பல்கலைக்கழகத்தில் நூற்றுக்கணக்கான பாலஸ்தீன சார்பு ஆர்ப்பாட்டக்காரர்கள் ஒன்றுகூடினர்.

அன் ஆர்பரில் உள்ள மிச்சிகன் பல்கலைக்கழகத்தில், டசின் கணக்கான மாணவர்கள் சனிக்கிழமையன்று பட்டமளிப்பு விழாக்களை இடைமறித்தனர். பாலஸ்தீனிய கொடிகள் மற்றும் காஃபியாக்களால் (kaffiyeh) போர்த்தப்பட்ட அவர்கள் அமெரிக்க கடற்படை செயலாளர் கார்லோஸ் டெல் டோரோவின் (Carlos Del Toro) கருத்துக்களை இடைமறிக்க முயன்றனர்.

டெட்ரோயிட்டில் வேன் மாநில பல்கலைக்கழகத்தில் 100க்கும் மேற்பட்ட பேராசிரியர்களும் பிற பேராசிரியர்களும் ஏப்ரல் 30 அன்று ஒரு கடிதத்தில் கையெழுத்திட்டு ஏப்ரல் 26 அன்று நடந்த நிர்வாகக் குழுக் கூட்டத்தில் எதிர்ப்புத் தெரிவித்த மாணவர்களுக்கு எதிராக பொலிஸ் தலையீட்டைக் கண்டித்தனர் அதில் ஒரு மாணவர் கைது செய்யப்பட்டார்.

அந்தக் கடிதத்தின் ஒரு பகுதி பின்வருமாறு கூறப்பட்டிருந்தது:

“ஏப்ரல் 26 வாரியக் கூட்டத்தில் இந்த பல்கலைக்கழக மாணவர்களுக்கு எதிராக பல்கலைக்கழக அதிகாரிகள் நடத்திய வன்முறைச் செயல்களை நாங்கள் சந்தேகத்திற்கு இடமின்றி கண்டிக்கிறோம். குறிப்பாக, ஒரு பெரிய மாணவர் குழு பொலிஸ் மற்றும் வளாக பாதுகாப்பு பிரிவினரால் தாக்கப்பட்டு வன்முறை செய்யப்பட்டதை மௌனமாக வேடிக்கை பார்த்துக் கொண்டிருந்த அதிபர் கிம்பர்லி எஸ்பி மற்றும் ஆளுநர்கள் குழுவை நாங்கள் குறிப்பாக கண்டிக்கிறோம்.”

சனிக்கிழமையன்று புளூமிங்டனில் உள்ள இந்தியானா பல்கலைக்கழகத்தில், டசின் கணக்கான மாணவர்கள் காஸா போருக்கு எதிர்ப்புத் தெரிவித்து பட்டமளிப்பு விழாவில் இருந்து வெளிநடப்பு செய்து, வளாக முகாமில் மற்ற எதிர்ப்பாளர்களுடன் இணைந்தனர். பட்டமளிப்பு ஆர்ப்பாட்டக்காரர்களின் முதல் குழு “அதை மூடு” மற்றும் “பாலஸ்தீனத்தை விடுதலை செய்” என்று முழக்கமிட்டதுடன், பல்கலைக்கழக தலைவர் பமீலா விட்டன் (Pamela Whitten) தனது தொடக்க உரையைத் தொடங்கியபோது வெளிநடப்பு செய்தனர். இரண்டாவது குழு, முக்கிய பேச்சாளரான தொழில்நுட்ப கோடீஸ்வரர் ஸ்காட் டோர்சியின் (Scott Dorsey) உரையின் போது வெளிநடப்பு செய்தது.

கொடூரமான பொலிஸ் ஒடுக்குமுறைக்கு இடையிலும், போராட்டங்கள் தொடர்கின்ற நிலையில், இரண்டு கட்சிகளின் அரசியல்வாதிகளும் அவர்களின் பாசிசவாத வாய்வீச்சையும், போராட்டக்காரர்களை “வெளியில்” உள்ள எதிரிகள் மற்றும் பயங்கரவாத சக்திகளுடன் தொடர்புபடுத்துவதற்கான அவர்களின் வெறித்தனமான மற்றும் ஆதாரமற்ற முயற்சிகளையும் தீவிரப்படுத்தி வருகின்றனர். ABC இன் “ஜோர்ஜ் ஸ்டீபனோபௌலோஸுடன் (George Stephanopoulos) இந்த வாரம்” ஞாயிறு பதிப்பில், ஒரு முன்னாள் போலீஸ்காரரும் ஜனநாயகக் கட்சியாளருமான நியூ யோர்க் மேயர் எரிக் ஆடம்ஸ் (Eric Adams), இனப்படுகொலை எதிர்ப்பு ஆர்ப்பாட்டக்காரர்களை அவதூறு செய்வதிலும் மற்றும் ஜோடிப்பதிலும் ஆர்கன்சாஸின் பாசிசவாத குடியரசுக் கட்சி செனட்டர் டாம் காட்டனுடன் (Tom Cotton) போட்டியிட்டார்.

நடுவர் ஜொனாதன் கார்ல் (Jonathan Karl) அளித்த நட்புரீதியான பேட்டியின் போது, முதல் விருந்தினரான செனட்டர் காட்டன், மாணவர் போராட்டங்களை “சிறிய காஸாக்கள்” என்று அழைத்தார், மாணவர்கள் மீது “இறுதித் தீர்வுக்கான” அழைப்புகள் உட்பட “மோசமான, யூத விரோத பேச்சுக்களைப் பாடுவது” என்று குற்றம் சாட்டினார், அவர்கள் மீது “வெறுக்கத்தக்க பேச்சு” மற்றும் “யூதர்களைத் தாக்கும்” என்று குற்றம் சாட்டினார், எந்த ஆதாரமும் வழங்காமல், “காஸாவில் ஒவ்வொரு பொதுமக்கள் உயிரிழப்பும் 100 சதவீதம் ஹமாஸின் தவறு” என்று கூறினார்.

அவரைத் தொடர்ந்து ஆடம்ஸ் வந்தார், கொலம்பியா பல்கலைக்கழகம், நியூ யோர்க் பல்கலைக்கழகம், தி நியூ ஸ்கூல் மற்றும் நியூ யோர்க் சிட்டி கல்லூரி ஆகியவற்றில் நடந்த போராட்டங்கள் “வெளியில் இருந்து வந்த கிளர்ச்சியாளர்களின்” வேலை என்ற அவரது முற்றிலும் ஆதாரமற்ற குற்றச்சாட்டை அவர் மீண்டும் வலியுறுத்தினார்.

ஒரு டன் குண்டுகள், ஜெட் விமானங்கள் மற்றும் டாங்கிகள் உட்பட இஸ்ரேலுக்கு அமெரிக்கா ஆயுதமளிப்பதும், காசாவின் பாலஸ்தீன மக்களை படுகொலை செய்து, பட்டினி போட்டு பலவந்தமாக இடம்பெயர்த்து வரும் சியோனிச ஆட்சிக்கு முழு அரசியல் மற்றும் இராஜாங்க ஆதரவும் இளைஞர்களை தீவிரமயப்படுத்த போதுமானதாக இல்லை என்பது போல, “நமது இளைஞர்களை தீவிரமயப்படுத்துவதற்கான ஒரு உண்மையான முயற்சி அங்கே உள்ளது,” என்று அவர் கார்லிடம் கூறினார்.